آنا یارپاک
منیم قلمیم آنا دیلیمده یازماق ایستهییر،
اؤز گه دیلینده یوْخ ...
چۆنکۆ قلمیم آنا دیلینده، دۆشمانا قارشی گۆجلۆ سیلاح دېر.
بیر اولوسو آییرماق ایستَییرسنسه دیلیندن
یئتر او اولوس دیلینی[۱] کسهسن مکتبیندن
بو سیاست یۆرۆدۆلۆر «ایران فارس دؤولتیندن»[۳]
دیلینی آلسان ألیندن، یادېرغار منلیڲیندن
اۆممَتچیلیک[۳]أڲیتیمی، آییرار کیملیڲیندن.
(بیتیڲین ۶۹ -جو صحیفه سی ۲-جی بند)
("وطن هاواسی" ائلدار گونئیلی)
دیلمیزی قۏروماق اؤزۆمۆزۆ، سۏیوموزو، وطنیمیزی، هۏوییَت'له کیملیڲیمیزی قۏروماقدېر. بوگۆن دیلیمیزی، وطنیمیزی منیمسهمهسَک آیاق آلتېندا أزیلیب کئچمیشیمیز (تاریخیمیز، سۏیوموز) هابئله گلهجهڲیمیز یۏخا چېخاجاق. اؤز اوشاقلارېلا فارسجا دانېشېب، یازېشانلار سۏیلارېنا وطنلرینه، هۏوییتله کیملیکلرینه سۏن قۏیورلار. اۏنلار فارس ایچینده فارس، اؤز میللتی ایچینده ده تۆرک سایېلمایاجاقلار. اۏنلار داها اؤزگهلَشیب ائلهجه ده مانقورت اۏلموشلار.
اؤزۆنه دَڲَر وئر یئرینده سایېل
فارسا کؤله اۏلما گؤزۆن آچ آیېل
اوشاغا وئر میللی بیلینج قال هایېل
کئچمیشینه اؤز سۏیونا یۏووشسون
وارلېغېنا تۆرک خالقېنا قۏووشسون
چۆنکۆ اینسان؛
✅ اؤز وارلېغېنې تانېسا، اؤزۆنه اینانسا، اؤزۆنه دَڲَر وئرسه
✅ باشېنې اوجا توتار، آلچاقلارېن آشاغېلاماسېلا اۆزلشمز.
بو گۆن چۏخ اولوسلو ایران آدلانان اؤلکهده أگهمن اۏلان فارس آشېرې اولوساللېغې(میللیتچیلیڲی) آزربایجان تۆرک اولوسو(میللتی-خالقې) باشدا اۏلماقلا فارس اۏلمایان اولوسلارا اؤز قاتې سۏیجولوقلا(شۏوۏنیستی) ﺳﺆمۆرگهچیلیک اؤتهڲینه(تاریخینه) دایاناراق، یوخارېدا وورغولادېغېم کیمی بو اولوسلارې اؤز کئچمیشیندن، کیملیڲیندن هابئله بۆتۆن اولوسال(میللی) وارلېغېندان اوزاقلاشدېرېب، وار گۆجو ایله فارس اولوسو ایچینده أریدیب یۏخ ائتمهڲه چالېشېر.
ماراقلېسې؛ ایران ایسلام یؤنَتیمینین دینسَل(دینی) ائلهجه ده یؤنَتکیسل (سیاسی) اؤندری، سیدعلی حسینیخامنهای، بو دانېلماز گئرچکلری دیله گتیرهرَک، فارس اولوسونو چۏخ قاتې بیچیمده بئله بیر چَتین دوروملارا قارشې آیاقدا اۏلمالارې اۆچون دؤنه-دؤنه اویارماسې، ایلگینچ دیر. سؤزده ایسلام یؤنَتیمینین باشېندا دوران کیشی، آیدېنجاسېنا آچېقلادېغې بئله بیر گرگینلیڲی، فارس اولوسونا دۆشر(روا) گؤرمهدیڲی دورومدا، بو گرگینلیڲی خامنهای- ‘له فارسلارېن اؤزلری بیلهرَکدن ایرانداکې فارس اۏلمایان اولوسلارا اویقولاماسې دېر. بیلدیڲنیز کیمی فارس فاشیست أگهمنلیڲی ایراندا، فارس اۏلمایان اولوسلارېن اۆزَرینه اۏنلارېن بۆتۆن اولوسال-اویغار (مدنی) هابئله دیل کیملیک’له وارلېقلارېنې یۏخ ائتمک یؤنَتکیسینی(سیاستینی) یۆرۆتمکده دیرلر.
سیدعلی حسینیخامنهای-نین یوخارېدا وورغولانان یؤنَتکیلری هابئله چئشیدلی-آیرېملې (فرقلی) باخېشې دئمهلی (یعنی) ایران أڲهمنلیڲینین فارسلارې قۏروماق، آنجاق بونون ترسینه اۏلاراق فارس اۏلمایان اولوسلارېن اۆزَرینه یۏخ ائتمک آجېماسېزلېغې ایله اؤزگهلشدیرمه کیمی سۏیجولوق یؤنَتکیسینی یۆرۆتمک دۆشۆنجهلری’له ایشلری، هر بیر گۆنئی آزربایجانلې تۆرک کیشیسینده اۆرهک آغرېسې یاراتماسې هابئله آغېر بیر تۏپلومسال آلېزلېغې (خستَلیڲی) بیر ده اویغار دیل یاراسېنېن اۏلوشماسې ایله سۏنوجلانماسېنا اینانېرام. اۏنا گۆره ده دۆشۆنۆرم سیدعلی خامنه انېن بو دۆشۆنجهسی، ائلهجه ده بۆتؤولوک ده یئنی أله گلمیش هابئله قېسا یاشاملې قۏندارما ایران فارس دؤولتچیلیڲینین کئچمیش پهلوی’له ایندیکی فارس مۏللا یؤنَتیمینین یۆرۆتدۆکلری بو کیمی بیر قورامسال-ائیلَمسل (نظری-عَملی) یؤنَتکیلری قارشېسېندا، هر بیر آزربایجان تۆرکونون اولوسال دویونج (ویجدان) هابئله یورد سئورلیک بۏرجو اۏلاراق، همی گۆنئی آزربایجان تۆرک اولوسونون، أن دۏغال (طبیعی) کیشیلیک (اینسانی)، اولوسال-اویغار تۆزهلرینی (حاقلارېنې) کۆتلهمیزین تک-تکینه تانېتمالې دیر. هم ده تۆرکلۆک-آزربایجانچېلېق بیلینجینین (شعورونون) دیرچلمهسینده قاتقې دا بولونوب تۆرکلره اؤز اولوسال-کیشیلیک اؤزگۆرلۆک’له باغېمسېزلېقلارېنې قازانمالارې ایچین یازقاجې (قلمی) ألینه آلاراق اؤز بئیین هابئله اۆرَک دۆشۆنجه ایله دویغولارېندان یارارلانماق'لا، ایران دؤولتینین بو چیرکین فارسلاشدېرماق یؤنَتکیسینی آیدېنلاشدېرمالې دېر. اۆستهلیک فارس دؤولتچیلیڲی ایله مۏللالارېن ألبیر اۏلوب بیرگه یۆرۆتدۆکلری تۆرکلۆک’له آزربایجانچېلېغې آرادان قالدیرماق کیمی پیساۆزلۆ آماجلارېنا (هدفلرینه) چاتماق یۏلوندا یۆرۆتدۆڲۆ دۆشۆنجهسَل هابئله اویغولامالې (عملی) ایشلرینین قارشېسېنې آلماق دا تۆم وار گۆجۆ ایله چالېشماق گؤروینده دیر.
من ده بیر گۆنئی آزربایجان تۆرکۆ اۏلاراق یازقاجې(قلمی) ألیمه آلېب اولوسال قۏنولار(مؤوضوعلار) اۆزَرینده (حاققېندا) یازدېغېم «وطن هاواسې» آدلې بیتیڲیمی(کیتابېمې)، اؤز گؤزهل آزربایجان یوردوم'لا سایقې دَڲَر تۆرک اولوسوما سونورام. آنجاق منیم بیر دویغولو قۏشار-قۏشوقچو(شاعیر) یازېنچې(ادبیاتچې) اۏلمادېغېمې دا بورادا وورغولاماق ایستهییرم. یوردومدان اوزاق دا ائلهجه ده یاد بیر اؤلکهده سۆرگون دورومدا یاشادېغېم سۆرَجینده؛ اؤز وطن اؤزلَمـیمی(حسرتیمی)، یوردوم آزربایجانېن ایکییـه بؤلۆنمهسینی، اؤزللیک ’له ده آنا یوردوم گۆنئی آزربایجاندا آنا دیلیمیز تۆرکجهسینین اۏخوللاردا ائڲیتیم(تحصیل) ائلهجه ده یازېلېب اۏخوماسېنا ایران دؤولتی یؤنوندن (طرفیندن) قاداغا قۏیولماسې'لا باشقا یؤندن(طرفدن) کئچن دۏخسان نئچه ایل سۆرجینده گۆنئی آزربایجان تۆرک یوردونون فارس فاشیست أگٖهمنلیڲینین (حاکیمییتینین) یۆرۆتدۆڲۆ یؤنَتکیلر(سیاستلر) سۏنوجوندا پارام-پارچا اۏلونماسې، منده بیر اۆرهک آغرېسې اۏلاراق، خالق'لا وطنیمده بو گئرچَک گئدیشلری، قۏشوق بیچیمینده یازدېغېم بیتیک «دویغوسال ائلهجه ده کؤکلهشیک (کلاسیک) یازېن(ادبی) باخېمېندان اوزاق گؤرۆنسه ده» من بو دۆزهنلی(نظملی) یازېلارېن هر بیر دیزه (میصراع) ایله بؤلومجهسینده (بندینده)، اؤز دۆشۆنجهلریمی اولوسال تۆرکلۆک’له آزربایجانچېلېق دویوسونو، وطن سئورلیک دۆشۆنجهسینی؛ دۆشوندهمه، دۆشۆنبیلیم (فلسفی)، یؤنَتکیسَل(سیاسی)، ائکۏنۏمی (اقتصادی) هابئله تۆزهسَل (حوقوقی) آچېلاردان بو بیتیک ده بیر یئره تۏپلاماغا چالېشمېشام.
باشقا هر بیر یازېلې یاپېتدا (أثرده) اۏلدوغو کیمی، منیم یازدېغېم «وطن هاواسې» بیتیکده ده، یانلېش، یارېمچېلېق هابئله چاتېشمازلېقلارېنېن اۏلماسېندان آرخایېنام. اۏنا گؤره ده بو بیتیک ده اۏلا بیلهجک هر تۆرلۆو یانلېشلا چاتېشمازلېقلارې دَڲَرلی اۏخوجولار'لا ألَشدیریجیلرین (تنقیدچیلرین) دارتېشماسېنا بوراخېب، گۆلر اۆز، آچېق بئیین’له اۏلا بیلهجَک بۆتون قېناقلاری دۏغال (طبیعی) هابئله گؤزل بیر قارشېلاما سایېرام. بو بیتیکده یازدېغېم قۏنولارېن، ایران فارس دؤولتی یؤنوندن بۆتۆن اولوسال-اویغار(میللی-مدنی) حاقلارېندان یۏخسون ائدیلهرَک آغېر باسقې'لا اؤزگهلشدیرمه یؤنَتکیلری ایله اۆزلهشن گۆنئی آزربایجانلې تۆرک سۏیداشلارېما یارارلې اۏلماسېنا، اۏنلارېن اولوسال تینلرینین (روحلارېنېن) اۏیاندېراجاغېنا اینانېرام. آنجاق وطن هاواسې اولوس ایچینده چالېنېرسا، دئمک اۏ وطن تئز-گئج قوشقوسوز (شۆبحهسیز) بیر گۆن اؤز باغېمسېزلېغېنې ألده ائدهجهڲینه اینانېب، سؤزومه . قۏیورام.
۱۷ فروردین( آغلار گولر ) ۱۳۹۵ ائلدار گونئیلی
[۱]بیر خالقؽن دیلینی الیندن آلدؽقدا، اوْ خالقؽن بۆتۆن آیت الله علی خامنه ای دئدییی وارلؽقلار الیندن آلؽنار
[۲] آیت الله علی خامنه ای(کیشی تۆپۆردۆیۆنۆ یالاماز. (بۉ آتالار سؤزۆدۆر) ۲۸ ایلدیر مملکتین رهبرییتینده اوْلاراق ایجازه وئرمه ییر حتتا اۆز یازدؽقلاری آنا یاسا (قانون اساسی) ایجرا اوْلۉنسۉن. آیت الله علی خامنه ای نین دانؽشؽغی و نیطقی ایله عملینی اوْخۉجۉ اوْلاراق دئیر وئرین.
[۳] مۆقللید[ایراده سیز، اۆزۆنه گۆوه نی(اعتیمادی)اوْلمایان، تسلیم اوْلان اینسان]
[۴]رۉزنامه همشهری ۲۲/۷/۱۳۹۱ صفحه ۱۳، بخشی از سخنرانی رهبر ج. ا. ایران در استان مرکزی آبان ماه ۱۳۷۹:
"اگر بیر میلّتین اؤز تاریخینی، کئچمیشینی، مدنیتینی، کیملیگینی و اؤز گؤرکملی علمی، دینی، سیاسی و مدنی شخصیتلریندن آییریب و اۇنوتدورسالار، عینی زاماندا اوْنون دیلینی، الیفباسینی و کیتابینی اوْندان آلیب و یاخود زامانلا یارانمیش کۆلتورونو اوْندان آلدیقدا، بو میلّت باشینا گتیریلهجک هر نهیه حاضیر اوْلاجاق. بو میلّت داها جانلانیب یاشایا بیلمهسی ایمکانسیزدیر، یالنیز اؤز ایچیندن گؤرکملی شخصیتلرین اوْرتایا چؽخماسی شرطی ایله. بو فاجیعهنی بیر چوخ اؤلکهلرین باشینا گتیرمیشلر."