ایران آدلانان اؤلکه‌ده، حادثه‌لر او قدر سورعتله باش وئریر کی، دونن اؤلکه‌نین گونده‌مینده اولان ماراقلی مسئله‌نین خبری، گون باتمادان اؤنجه کؤهنه‌لیر. اؤرنک اولاراق، آبادان‌دا متروپل بیناسینین چؤکوشوندن داغینتی آلتیندا قالان بیر چوخ وطنداشلارین جسدی تاپیلمامیش، پایتاخت تهراندا میللتین آمان_گومانلیق وار – دؤولتی نی مرکزی بانکین آمانات صاندیقلاریندان اوغورلادیلار! دؤرت گون یاتمیش پلیس قووه‌لری 2 گون عرضینده یازیق محبوسلاردان سانکی اوغروآدینا گتیریب کامئرا اؤنونه چیخارداراق ادعا ائتدیلر کی:« باخین، ایهالناس، بیز بویوق! اوغرولاری توتدوق، تالانان ماللاری قایتاردیق و هر شئی یئرینده دیر! ».
عجب!!! بیز گؤرموشوک کی، بو یئکه‌لیکده ایشدن اؤترو بیر و یا نئچه متهم توتوقلانارسا، اونلارین استنطاقلاری أن آزی بیر هفته دن بیر نئچه آیا قدر داوام ائدر و سونرا دادیارین کیفرخواستی ایله موقتی زیندانا گؤنده‌ریلر، جنایت‌لری یونگول اولارسا، وثیقه مقابلینده تدریجاً آزادلیغا بوراخیلارلار. نئجه اولور همن گون توتوقلانمیش اوغرو باشی لار، بو مرحله‌لری سووشدوروب اؤزو ده زولاقلی زیندان پالتاریندا نمایش ائتدیریرلر؟!
باخمایاراق ماللاری تالانمیش وطنداشلاری دا بورجلو چیخاریبلار و بو گونه قدر کیمسه‌نین ضرر- زیانی اؤده‌نیلمه‌ییب و آرخایین اولون کی، هئچ واخت دا اؤده‌نیلمه‌یه جک. چونکی اؤلکه‌نین عئیبه‌جر قانونونا اساساً 10 مین یورو دگریندن آرتیق ارز و قیمتلی ماللارین ساخلانیلماسی جرم سانیلیر. ایندی دوشونون اوغورلوق حادثه‌سیندن بیر نئچه‌گون اؤنجه مولکونو ساتمیش بیر وطنداشین عؤموربویو امگی باتیب، اوسته‌لیک اتهام آلتیندادیر!!!
نه ایسه؛ ایران‌ین «آگاهی پلیسینین» بو آخماقجاسینا فیلیم اویناماغی، یادیما عزیزنسینین بیر یازیسینی سالدی.
عزیزنسین یازیرکی: اینگیلیس‌دن تورکیه یه بیر هئیت گله‌سی ایمیش؛ استانبولون پلیس رئیسی زینداندا اولان أن تانینمیش اوغروباشینی گؤرور و دئییر کی:« سن بیزیم میللی منافع‌لریمیز اوغروندا بللی بیر تاپشیریغی یئرینه یئتیررسن سه، من ده سؤز وئریرم کی، سنی حبس دن آزاد ائدم!»
اوغروباشی دئییرکی:« جناب رئیس، من هارا، میللی مسئله هارا؟ آچیغینی دئه گؤروم نه ائتمه‌لی یم؟»
پلیس رئیسی دئییر:«اوچ گون عرضینده قوناغیمیز اولاجاق اینگیلیس هئیتی نین اشیالارینی ائله بیر شرایط‌له اوغورلاییب بیزه وئره‌جکسن کی، اؤزلری بیلمه‌سین‌لر»!
اوغروباشی دئییر: « بوندان آسان نه ایش اولا بیلر؟»
اوزون سؤزون قیساسی؛ هرگون یازیق اینگیلیس‌لی‌لرین پاپاغیندان توتموش پاسپوت، کیف ائله جه ده جورابلارینا قدر وسایل‌لارینی اوغروباشی جیبیدیب، پلیس رئیسینه وئریرمیش.
پلیس ده اعلام ائدیرمیش کی؛ اوغرونو توتموشوق، بو دا اوغورلانمیش ماللارینیز!
اینگیلیس هئیتی‌نین اوچ‌گونلوک سفرلرینین سونو، هاوا لیمانیندا (فرودگاه‌دا) اونلارین یولا سالارکن، ایستانبول پلیسینین رئیسی دئییر:« اومورام بو اوچ گونده خوش گونلر و خاطره‌لر له گئتمیش اولاسینیز، البته گؤردویونوز کیمی، یقین بیلیرسیز کی، بیزیم پلیس سیستئمیمیز نه قدر گلیشیب( پیشرفت ائدیب)، و أن قیسا زاماندا اوغرولاری تاپیب اوغورلانمیش ماللاری اؤز ییه‌لرینه گئری قایتاریریق!»
اینگلیس هئیتی‌نین باشچیسی، آیاقدان باشا عاغیللی آداملار سفئه لره باخان سایاق، پلیس رئیسینی سئزیر و دئییر:« دوغرودور، بیز بونو گؤردوک کی سیزین پلیس‌لرینیز چوخ باجاریقلی‌ایدی‌لار، آنجاق بونو دا گؤردوک و آرخایین اولدوق کی، پلیسین أن پوتاباشی ایله اوغروباشی‌نین ألی، بیر کاسادادیر و سیخ ایشبیرلیک ائدیرلر.»
دئمه‌لی بؤیوک اوغورلوق‌لارین بو تئزلیگه گؤزله‌نیلمه‌دن و غیرعادی بیر شرایط‌ده اوستو آچیلیب و اوغرولار توتوقلانیرسا، نتیجه آلیریق کی، او ایشین اویون اولماسینا شوبهه‌یئری قالمیر. ایستانبولداکی اینگیلیس هئیتی‌نین پلیس ألی ایله باشلارینا گلن اویونون، تهرانداکی آمانات صاندیقلارینین اوغورلانماسینین بیرجه دنه اساس فرقی وار؛ اودا بو کی، ایرانلی وطنداشلارین اوغورلانمیش ماللاری، هئچ واخت قایتاریلمایاجاق.
اودور کی: ایللر اؤنجه بیر شعریمین مطلعی نی یئنه ده خاطیرلادیرام؛
اوغرو کئچیب ایش باشینا؛ مملکتی چالیب چاپیر
حاق دییه‌نی قودوز کیمی، خیرتدالاییب توتوب قاپیر…
حبیب ساسانیان (یاکاموز)