۱ - بالتاجی آراز شاعیرین حیاتی

شاعیرین حیاتی

بالتاجی آراز آدی ایله تانينان محمد محمدعلی اوُغلو ۱۳۳۲- جی ایلین آبان آیينين بیرینده گونئی آذربایجانين، مرند بوُلگه سینده یئرلشن یوخاری دیزه کندینده دونیایا گلمیشدیر. اوُرتا تحصیلینی دوُغوما مرند شهرینده باشا چاتديرديقدان سونرا ۱۳۵۷-۱۳۵۳ ایللر آراسيندا ایستانبولون میمارسنان گوزل صنعتلر اونیوئرسیته سینده آلی تحصیل آلميشدير.
۱۳۵۷ -جی ایلده آنا یوردونا دوُندئوکده سوُلچو تشکیلاتين اوزوی کیمی اووه ل جه شاه رئژیمینه، سوُنرالار ایسلام حاکیمییتینه قارشی موباریزه آپارديغی ایللرده عینی زاماندا ادبی چاليشمالاری ایله ده مشغول اوُلموشدور. همین ایللرده ایلک شعیرلری تهران دا یایيلان "یولداش" درگیسینده اشيق اوزو گوُرموشدور.
۱۳۶۸ -جی ایلده اوُلوم تحلوکسی قارشيسيندا آنا یوردو مرند شهرینی ترک ائتمک مجبورییتینده قاليمش، آلمانیایا سيغیناراق سییاسی فعالییتینی بورادا دوام ائتدیرمیشدیر.
بالتاجی آراز اوُز مقاله و شعیرلرینده پهلوی سولالسی زامانی، ائلجده همین تفکورون دوامی اوُلان بوگونکی ایران ایسلام رئسپوبلیکاسيًندا فارس شوُونیزمی نین هئگه موُنلوغو و باسقيسی آلتيندا میللی و دینی ظولمه معروض قالميش آذربایجانين و آذربایجان تورکلرینین پروبلئملرینی، تاپتالانميش دوُغال حاقلارينی دیله گتیرمیش، یازدغی اثرلرینده آذربایجانين اوُزگورلوک (ایستیقلال) مفکورسینی بيليمسل، فلسفی، سياسی، حوقوقی، ايقتيصادی، ... اساسلارينين نظری تحلیلینی وئرمیشدیر.
شاعیر یاراديجيغيندا پارچالانميش بیر خالقين آنا یوردوندان دانيشير. گونئی ایله قوزئی آذربایجانين بوتُولشمسی حاققيندا دوشونجسینی اوُرتایا قویور.

شاعیر یازير:

اوُ تای ایله بو تای واحید بیر جاندير،  آدی اوُدلار یوردو آذربایجاندير!

شاعیر "اوُ تای، بو تای وطندیر" آدلی اثرینده اوُخوجویا بوتُو آذربایجان ایدئیاسئنی آشيلایير، ملتیمیزین سییاسی و میللی باخيمدان شعورلانماسی ایشینه اوُز پایينی وئریر. اوُ، بو اثرینده خالقيميزين بوتُو آذربایجان آرزوسونو، ایسته یینی یانسيًدان و یورد سئور اورکلرده بوتُو آذربایجان بایراغینی دالغالاندران گولوستان پوئماسينين یاراديجيسی اوُلان اونودولماز خالق شاعیریمز بختییار واهاب زاده یه ایتحاف ائتمیشدیر.

شاعیر بالتاجی آرازين دیگر اوُنملی اثری اویقارلاش آدلی کیتابيدير. شاعیر بو اثرینده اینسانلاريی اویقار، مدنی و چاغداش اوُلماغا، اوُز حاقلارينی تانيیيب قوروماغا چاغيرير. اوُ، آذربایجان تورک خالقينی ایسلامين گئریجی احکاملارينا، عئرقيچی فیردوسو سایاغی آنتی قادين دارگوروشلو باخيشلارا اویماماغا سه سلییر. اوُ قادين حاققيندا دار گوُروشلو باخيشلاری، تورک کولتورونۀ وایجتیماعییه تینه آشيلانميش ایرتیجاچی و گئریده قالمیش دوشونجۀ نی تانيدير، چاغداش اینسانا یاراشان باخيشلارينی اوُرتایا قوُیور. اوُنون فیکرینجه، قادين آزادلغی هر اوُلکۀ ده اوُنون مدنییه تی و اینسان حاقلارينی تانيماق اوُلچوسودور.
شاعیر دئییردی، آزاد آنا، آزاد اوُلاد یئتیشدیره ر، اینسان سئوه رلییی و اوُزگورلویو اوُنون روحونا آشيليیار. آزاد روحلو اینسان کوُلۀ اوُلماز، کوُلۀ ائتمه ز و هر زامان اوُز حاققينی آرایيب آلار.
بالتاجی آراز عمرونون سوُنونا ده ک گونئی آذربایجانين اوُزگورلویو، ائلئجه ده ائرمنی داشناکلاری طرفیدن ایشقال اولونموش قاراباغين آزادليغی اوغروندا قلمی ایله موباریزه آپارميشدير. بو مسله لر حاققيندا حاضيرلاديغی "تبریز ایله قاراباغيميزی کیم قورتاراجاق؟" آدليً کیتابيندا اوُ تای لی - بوتایلی سویداشلاريميزين اوُرتاق دردی - ایشقالدا اوُلان توُرپاقلاريميزی دوشونمک و بیرگه چيخيش یوُلو ایله باغلی دوشونجه و فیکیرلرینی یازميشدیر.

اوریی خالقلا دوُیونن شاعیریمیز اوُمرونون سون دقیقه لئرینده آذربایجانا حصر ائتدییی نوُوبتی شعرینی یازارکن ۱۳۹۱- جی ایل تیر آیينين بئشینده سحر ساحات ۵ ده، ئوره ک اینفارکتيً گئچیره ره ک دونیاسينی ده ییشمشدیر. شاعیر ۱۳۹۱- جی ایل تیر آیئنئن سگیزینده آلمانی یانين مونستئر شهرینده کی لاوهای ده مزارليغيندا تورپاغا تاپيشیریلیب.

یورد سئورگونئی آزربایجانين ایستیقلال شاعیری بالتاجی آرازدان آشاغيداکی:
"اویقارلاش،
اوُ تای، بو تای وطن- دیر،
تبریز ایله قاراباغيميزی کیم قورتاراجاق؟
آذربایجان آبستن استقلال است" آدلی اثرله ری یادیگار قالميشدير.

شاعیر اوُز ثمه ره لی یاشامينی سئودییی وطنینین و خالقينين آزادليغی یوُلوندا ارمغان قوُیموشدور. اونون اثرله ری ۱۳۸۲- جی ایلدن ائتیبارن آزاد تریبون و سول گوناذ اینتئرنئت سیته له رینده یایيملانماقدادير.

قایناق: شاعیر بالتاجی آراز 
www.otay-butay-vetendir.com/ir

بالتاجی آراز شاعیرین 8-جی ایل دونومو موناسیبتینه آ-ن_ت تیویده آنؽم یایؽمی