۱۷ - ائله ياتمايين کی، آلتدان سو چيخا.
ائله ياتمايين کی، آلتدان سو چيخا.
ائله ياتمايين کی، آلتدان سو چيخا
سيخينتيلار بوغازينيزی سيخا
ائله ياتما کی، سن اکه نی بيچه
صاباحکی دوشمنين الینه کئچه
ائله ياتما کی، صاباح الدن گئده
يارينکی دوشمنلرين کاما يئته
ائله ياتما کی، اوزوندن گئده سن
صاباحکی دوشمنه قوللوق ائده سن
ائله ياتما کی، شوعارلارين سونه
صاباحکی دوشمنين سوزوندن دونه
ائله ياتما کی، بيليکسيز قالالار
صاباحکی دوشمنه داوول چالالار
ائله ياتما کی، خئيريندن کئچه سن
ايچ دوشمنلرين يولونو سئچه سن
ائله ياتما کی، بيليکسيز قالاسان
موقلليد تکين اويونجاق اولاسان
ائله ياتما کی، يوخو اوسته له يه
اوغراديًلاسان آغير خسته لييه
ائله ياتما کی، خالقين دا اويويا
دوشه دوشمنين قازديغی قويويا
ائله ياتما کی، اينقيلاب صاباحی
اوز اوستونه قايتارالار سيلاحی
ائله ياتما کی، ايستيقلالدان سونرا
ايدئولوژيک اولا آنا ياسا
ائله ياتما کی، دئموکراسی اوله
آذربايجان دونه بير قانلی گوله
ائله ياتما کی، حوکوم سوره تييه
چوغونلوق آزليغين حاققينی يئيه
ائله ياتما کی، دئيه حاققين يوخدور
چوغونلوغونکی آزينليقدان يوخدور
ائله ياتما کی، ايستيقلال صاباحی
قانون قويوجو ائده لر آللاهی
ائله ياتما کی،آلله روح ساييلا
ايش- ايشدن کئچديکدن سونرا آييلا
ائله ياتما کی، بير اوووج بزيرگان
سربست اولا کی، خالقا اوتدورا قان
ائله ياتما کی، ديکتاتور اوره ته
يازيلماميش قانون ايله يونه لده <
ائله ياتما کی، آلله يازقی يازا
اينسانين يازديغی يازقينی پوزا
ائله ياتما کی، آلله قانون قويا
ايبطال ائدنين دریسینی سويا
ائله ياتما کی، آلله قاضی اولا
حاق وئرمه يه دوخسان بش فاييز قولا
وئريلمز حاقلاريميز الده قالا
ائله ياتما کی، موللاسی توولايا
"جننت" يئمی ايله خالقی اوولايا
ائله ياتما کی، بوشانسا اريندن
يوخسون اولا اوره تديگی اوروندن
ائله ياتما کی، قادين کوله قالا
کئچيم درديندن "اوزو يولا" اولا
ائله ياتما کی، ائرکک اوستون اولا
طالاق حاققيندان قاديًن يوخسون اولا
اوشاق حاققيندا آنا يوخسون اولا
ائله ياتما کی، قادين گون گورمه يه
بوتون ساحه لرده حوکوم سورمه يه
ائله ياتما کی، ايشسيز ايش بولمايا
ايشسيزين خرجینی وئرن اولمايا
ائله ياتما کی، قاچاق مال ساتيلا
قارا ياخانين بوينونا آتيلا
ائله ياتما کی، حسرت قالا آشا
يوخسوللوقدان پيسليکلره بولاشا
ائله ياتما کی، يازقی پيس يازيًلا
يوخسوللوقدان اخلاقييات پوزولا
ائله ياتما کی، يوخسللوق اوزوندن
پيس ايش گوره کی،اوتانا اوزوندن
ائله ياتما کی، يوخسوللوق بورويه
ائلين اوره تيجی گوجو چورويه
ائله ياتما کی، سيقورتاسيز قالا
پاراسی يئتمه سه سارليب- سولا
ائله ياتما کی، يوخسول ائوسيز قالا
هم ده وطن اوغروندا يوخسول اوله
ائله ياتما کی، کامينا يئتمه يه
يوخسول اونيوئرسيته يه گئتمه يه
ائله ياتما کی، گيرئو ياساخلانا
پيکئت کئچيرن توتولوب- ساخلانا
ائله ياتما کی، توخومو اکيله
سيياسی اينسانا دوستاق تيکيله
ائله ياتما کی، اکديگين بيتمه يه
دوشونجه اوزگولوگونه يئتمه يه
ائله ياتما کی، اولا فرقلری:
عئينی اولمايا بيرئيسل حاقلاری
ائله ياتما کی، حاققين اولا هدر
آلا بيلمه يک فيرانسيزلار قدر
ائله ياتما کی، دئموکراسی باتا
فئودال- کومپرادور کاما چاتا
ائله ياتما کی، تک پارتيلی اولا
دوولتين ايشلری اورتولو اولا
ائله ياتما کی، دوولت ارباب اولا
خاديم ائتمک اوچون اينقيلاب اولا
ائله ياتما کی، تاجير قيمت قويا
اوجوز آلا، باها ساتا، جيب سويا
ائله ياتما کی، بير اوووج فئودال
مئکانيزاسييونا چئويره دال
ائله ياتما کی، ياشايا فاييزه
فاييز ايله ائتمه يه مئکانيزه
ائله ياتما کی، مورادا يئتمه يک
صنايئلشديرن يولو گئتمه يک
ائله ياتما کی، موستمله که قالاق
مونتاژ ائتمک اوچون تراکتور آلاق
ائله ياتما کی، توکه ديجی قالاق
ميللی ايقتيصادی پيس کوکه سالاق
ائله ياتما کی، ساييسيز دردلری
آنلاتماق اوچون آشام سرحدلری
ائله ياتما کی، سانسورسوز دونيادا
قويمايا آراز خالقينی اويادا.
14.10.2006 بالتاجی آراز