۱۸ - دئديم: "لوطفن دئموکراسييا بيلدير!"
دئديم: "لوطفن دئموکراسييا بيلدير!"
من سنه، سن ده منه اويره ت دئدی
دئديم عاريف "آ" دان آنلايار "ز"ئدی.
دئدی تورکون آغلی عرب آغليدیر
دئديم جهليندن اوره گيم داغليدیر.
دئدی کيم بابکیميزی دوغرادی؟
دئديم کيم باشينا ووردو آغلادی؟
دئدی موللا بيزی موسلمان ائتدی
دئديم آغيًل آلدی، جهل ساتدی گئتدی.
دئدی موللا هر نه دئسه دوغرودور
دئديم بلکه دوغرو دئييل، ايریدير؟
دئدی موللانين تنقيد حاققی واردير
دئديم او حاقدان يوخسون خالق "داوار"دير.
دئدی موللا اولچر، من ده بيچرم
دئديم من شراب دوزه لديب ايچرم.
دئدی قورآنی آنلاماق چتيندير
دئديم آنلاشيلمايان شئی چوپوندور.
دئدی قورآنين ديلی تورکون دئييل
دئديم اوخويوب- قانماق اوچون دئييل.
دئدی من قورآندان هئچ آنلامارام
دئديم من بيليکسيزی دانلامارام.
دئدی قورآن ياخشی آنا ياسادیر
دئديم کوهنه عرب اوچون خاصادیر.
دئدی آلله گرک يول تعيين اتسين
دئديم هر صينف آغلينی آيين اتسين.
دئدی آلله ان آغيللی قاضيدیر
دئديم آلله بايات بورژووازيدیر.
دئدی آشاغيلاماغين حددی وار
دئديم هر صينفين گوروشو خططی وار.
دئدی موسليم آللاهی نين قولودور (تسليم اولموش)
دئديم کوله ائدن اينسان اوغلودور.
دئدی اينسان دوغوشدان موسلماندی
دئديم بير نوو ماتئرياليست حئيواندی.
دئدی حئيوانلارين دا آللاهی وار
دئديم رعييت ين آنجاق شاهی وار
دئدی آلله يوخسا، يارادان کيمدیر؟
دئديم دوغانين تانريسی جيسيمدیر.
دئدی کيم بو مادده نی جانلانديريب
دئديم هوجئيره اوره تن قانديريب.
دئدی آلله روحدو، ياخود آغيلدیر
دئديم جهلين سويله ديگی ناغيلدیر.
دئدی علمين دئديگينه اينانما
دئديم گوزوکمز يوخلاری وار سانما.
دئدی آلله منی داردان قورتاردی
دئديم بختی يار اولان بختيياردی.
دئدی خوشگون گورن يوخدور بو يئرده
دئديم آلله يوخدور کی، يارديم ائده.
دئدی آلله سربست ائديب سينايا
دئديم يوخدور کی،داش ائده قينايا.
دئدی آلله سيناماقدان يورولمور
دئديم بيزيم صبير تاسيميز دولمور.
دئدی آلله ظاليمی داش ائدردی
دئديم اونداکی، يالان يئديرردی.
دئدی آلله بيلره کدن اولدورور
دئديم علم ميکروبو قاتيل بيلديرير.
دئدی قاتيل آنالاری آغلادار
دئديم هم آغلاتار، هم ده ديغلادار.
دئدی آلله دردايله درمان وئريب
دئديم اوکوز ناغيلی سونا ايريب.
دئدی بيزذرره ييک، آلله اکبردی
دئديم آغيل باخيميندان اصغردی.
دئدی لعنت پيسه، رحمت ياخشييا
دئديم روح خاطيره دير کی، داشييا.
دئدی روحون آغيل شکلی آلله دی
دئديم تاجيردیرکی، کولگه سی شاهدی.
دئدی روحون فهله شکلی "ملک"دیر
دئديم چينينده قوردوغو کلکدیر.
دئدی روحون ائرکک شکلی "قيلمان" دیر
دئديم دورد آرواد آلان موسلماندیر.
دئدی روحون اود شکلی "جهننم" دیر
دئديم يانان يوخسول ايله صنمدیر.
دئدی روحون يايلاق شکلی "جننت"دیر
دئديم "جننت" ائدن واردير زينتدیر.
دئدی آلله روحدو، کولگه سی شاهدیر
دئديم تاجيرينکی ... آيت الله دیر.
دئدی "او" دونيا روحون توپلاميدیر
دئديم ايچی- بوش ماليًن رئکلاميدیر.
دئدی بو دونيا مادده دونياسيدير
دئديم دآواميز قانون دآوآسيدير
دئدی سن بامباشقا اولچوب- بيچيرسن
دئديم سن ده قيلی توکدن سئچيرسن.
دئدی آلله آلتدا دئييل، اوسته دیر
دئديم جاهيلين منطيقی خسته دیر.
دئدی "جننت"ده يئمک ايچمک بولدور
دئديم روح يئمز کی، بو نه قُوولدور؟
دئدی "جننت"ده بول- بول حوری واردير
دئديم اوزونو اوتاران داواردير.
دئدی "جننت"ده کی ايشلمز يئير
دئديم اربابا پای آلديران دئير.
دئدی "جننت"ده چوخلو آخار چای وار
دئديم چایسيز عربيستاندا يای وار.
دئدی آلله دئييب يئره ال قويما
دئديم قانسوردوران قانونا اويما
دئدی آلله دئييب اربابا پای وئر
دئديم اکينچینيندير اکديگی يئر.
دئدی آلله قولو رعييت ائديب
دئدیم پيسدن بوشانيب پيسه گئديب.
دئدی قانسوران ارباب مسجيد تيکير
دئديم کوله يئتيشديرير کئف چکير.
دئدی وارلی يوخسولا بيگانه دی
دئديم هر کس اوز صينفيندن يانادی.
دئدی تاجير ماليمی اوجوز آلير
دئديم اوجوز آلديغی قدر چالير.
دئدی آغيللی چاره بولماليدیر
دئديم هر صينف سيياسی اولماليدیر.
دئدی حاقدان يانا اينسان دينچیدیر
دئديم يئره ال قويان اکينچیدیر.
دئدی دورد آرواد دير بير کيشیيه
دئديم آلله ظولوم ائدر ديشیيه
دئدی آرواد قاضی اولسا گوز اويار
دئديم موسليم اوز آروادينی دوير
دئدی نوفوسون ياريسی آرواددیر
دئديم آرواد قول اولماغا آزاددیر
دئدی طالاق حاققی اولان قول ائدر
دئديم قول اولماسا آلله کول ائدر
دئدی آلله آروادا حاق وئرمه ييب
دئديم آرواد مورادينا ايرمه ييب
دئدی آلله آروادی تارلا سانيب
دئديم دينچی اولماق عئييبدير،عئييب
دئدی آلله دئميش دينسيزی اولدور
دئديم لطفا دئموکراسييا بيلدير
دئدی عاليملر*نييه دينچیدیلر؟
دئديم "آ" دئديم مندن اينجیدیلر
*-دوغادا عاليم، توپلومدا گئريچی (ايرتيجاچی)
دئدی قويما ايسلام دون دييشديره
دئديم يئل دئييل کی، يون دييشديره.
دون دييشديره بيلر، يون دييشديره بيلمز.
چونکو:
"ماهييت دييشمز شوبهن اولماسين".
18.01.2005 بالتاجي آراز